Somos sensibles ó dereito á educación en comunicación e de expresión comunicativa das persoas do rural e buscamos inculcar hábitos de análise crítica da realidade mediática nas persoas máis novas. Organizamos e participamos en eventos relacionados cos media locais. O último encontro que organizamos foi ‘Pingueira. Encontro de coaprendizaxe en contexto’. Participamos anualmente nas as ‘Jornades d’educació en Comunicació’ organizadas por Aula Media (Barcelona) e o Encontro ‘Educadores pola paz’ de Nova Escola Galega.

Desenvolvemos proxectos editoriais e audiovisuais, tanto documentais coma de ficción, e contidos tanto cinematográficos coma televisivos. A nosa última produción é ‘O Moredo. A resistencia do entroido ribeirao’ (2016), dirixido por David Vázquez, un diálogo entre vellas e novas formas de entender esta festividade. Temos impulsado un programa de Residencias documentais, ‘Confrontar a Ribeira Sacra’. En colaboración cos centros educativos da comarca e Televinte vimos coordinando nos últimos anos curtametraxes, reportaxes, documentais e videoclips producidos polo alumnado.

Durante estes anos temos colaborado na dinamización sociocultural da nosa contorna a través de dispositivos diversos. Temos feito a produción de exposicións, como a primeira retrospectiva en Galiza do pintor e arquitecto Manuel Jorge: ‘Pinceladas galegas, trazos mediterráneos’. Tamén temos producido concertos, coma o ‘ Concerto de cámara homenaxe a Manuel Jorge’. Ademais organizamos coloquios e obradoiros sobre cultura rural que faciliten o diálogo de saberes, do mesmo xeito que desenvolvemos proxectos web e multimedia.